P/E, 利率真解! interest rate, equity stock profit earning

何謂P/E?
市盈率,
公式: 市盈率 = 股價 / 每股盈利.
如果企業每股盈利為5元，股價為40元，市盈率是8倍。

市盈率反映市場對企業盈利的看法。
市盈率越高暗示市場越看好企業盈利的前境。
對於投資者來說，市盈率過低的股票會較為吸引。不過，在訊息發達的金融市場，市盈率過低的股票是十分少見。

單憑市盈率來揀股是不可能的。投資者可以利用每股盈利增長率（Rate of EPS Growth），與市盈率作比較(現時投資界普遍使用盈利增長比率(PE/Growth)，多於單單看P/E)，對於一間增長企業，如果其股價是合理的話，每股盈利增長率將會與市盈率相約。
(即是市盈率除以盈利增長百分比，低於1即代表便宜。如目前市盈率約8倍，假設每年增長25%，即8/25，結果為0.32，顯示十分便宜。買股票是買未來賺錢能力，PE要識睇，PEG更要識。)


以下摘錄自5月4日曹仁超先生的"投資者日記"
P/E高低並無準繩

　　成功的投資並不需過人智慧，而係在於控制自己情緒，例如抗拒獲利回吐的誘惑，以及行使止蝕的決心；其次係耐性，因為市場初期唔會回報你o既正確分析，到群眾認同自己正確睇法，通常需要三年時間，完全係意志力o既考驗。EQ較IQ更重要，此乃大學教授投資成績唔會比家庭主婦好o既理由。統計數字證明，IQ高的人往往係失敗投資者，因為佢太理性分析，而忽略投資市場o係非理性一面。我地o既教育制度有助提升個人IQ，但對EQ卻冇得教。例如面對「偏高」價怎辦？IQ高o既人往往去拋空，希望從中獲利，結果偏高價之後往往出現更高價，理由係拋空者無法低價補回，被迫在更高價平倉離場。因此，偏高價可以獲利回吐或唔理佢，千萬不可理性分析；面對偏低價情況亦一樣，偏低價唔係買入理由，只有「當頭起」才是買入理由（例如出現一浪高於一浪，或由最低價反彈15％）。投資永遠係一門藝術而非科學。

　　貝南奇希望增加聯儲局透明度，但在前景不明朗情況下，係無法增加清晰度。或者佢開始明白格蛇講話點解連佢太太都唔了解。有關利率的謬論至今仍有市場（例如減息睇好股市及樓市，加息睇淡股市及樓市；2001年至今市場表現剛剛相反）。諗深一層，點解要減息？因經濟步入放緩期，公司純利增長減少或倒退，所以減息對股市而言係壞消息；反之，點解要加息？因經濟過熱，公司純利大幅上升。所以，加息對股市而言係好消息（直至最後一次加息）。

　　另一謬論係P/E的高低，其實並冇準繩。1973年恒生指數P/E曾見過一百倍以上，1974年12月P/E亦見過六倍；上述情況同樣在其他新興市場出現，例如台灣1989年P/E曾見九十倍，依家係十倍，如睇P/E，台灣股市係咪特別吸引？

　　任何行業都有本身循環周期。以大家比較熟悉o既房地產為例，2003年受沙士疫情影響，如以今天會計方法，需要為手上投資物業減值，在此情況下，2003年本港冇一間地產公司可在2003年產生純利（仍公布獲利，只係冇將投資物業減值），結果2003年地產股P/E如果唔係大升就係冇P/E（冇純利何來P/E？），咁係咪2003年地產股唔值得投資？反之，去年物業大幅升值，來自物業重估已可產生驚人純利，令地產股P/E大幅下降，部分更跌至單位數，咁低P/E係咪好值得睇好？

　　以能源股為例，油價十美元一桶時，唔少能源股好難獲利，因為開採成本每桶十五美元，係咪唔值得投資？當油價升至七十五美元一桶，能源股無不獲巨利，因為開採成本每桶十五美元，每桶油賺六十美元，咁能源股係咪可睇好？

　　再以酒店股為例，65％入住率係打和點（即房間出租率達65％o既話，收入只夠開支）。2003年沙士期間，香港酒店入住率只有45％，本港酒店冇一間賺錢（除非有其他收入例如租金）。今天自由行令本港酒店房間入住率升至90％兼加房租，酒店純利大升，令酒店股P/E急跌，係咪可再睇好前景？

　　低P/E一定好、高P/E一定差？如果投資咁簡單便可賺錢，小學三年班學生一定較各位更叻，因為佢地D加減乘除數較各位計得更快。

尋求行業盛衰周期

　　正確態度係尋求行業盛衰循環周期，分析前景而唔係只睇P/E高低。例如油價七十五美元一桶，後市能源股應睇好還是睇淡？主要視乎明年油價睇幾多。如明年油價睇八十美元以上，便繼續睇好；反之，如明年油價估計見七十美元以下，便應獲利回吐，因股價係反映對未來估計，而非過去賺幾多錢。成功投資者應學曉夏天買棉被、冬天買草帽。原材料價係最唔易掌握的東西，通常一個上升周期長達三、五、七年；即最短三年，一般可維持五年，最長七年，然後便係咁跌。請記住，能源股、礦務股係周期性十分重o既股份，而非增長股。由2001年起計，今年已是原材料股第五年上升，最近巴西股市、墨西哥股市創新高，可反映呢方面情況，因愈來愈多國家將天然資源國有化，令天然資源供應進一步短缺。

　　投資同談戀愛有好多地方相似。例如婚前挑選自己所愛（choose your lover），婚後宜愛你所選（Love your choice！）。黃金亦一樣，雖然唔少人在挑選所愛方面正確，但因為愛得唔夠深，結果太早放棄自己所愛，眼光光睇住自己所愛投入別人懷抱，變成愛恨交加。唔少人體驗到讓利潤往前跑唔易做到，以及明白There is no fever like gold fever！呢次黃金牛市二期表現似足第三期，太瞬息萬變了，已冇人再可以事前估計佢點走，只知道利率未高於CPI增長率二厘或以上前，係無法馴服黃金的。2001年起黃金進入長期牛市，美元匯價進入長期熊市，此乃大方向，至於短期波幅無人能猜得準。

　　中國1978年宣布採用改革開放政策，1979年深圳成為特區，1980年開始吸引香港工廠內移，形成本港工人就業機會減少，只有向其他唔需要技巧o既服務業進軍，令本港最低收入25％人口過去二十五年實質收入（即扣除通脹）改善有限。隨o左深圳服業業水平提升，1997年起連本港中產階級職位亦受後勤基地內移影響，走上1980年起工人之路。

新移民成低下層埋怨對象

　　換言之，1980年起本港有25％就業人口收入停滯不前；但到o左1997年8月後，本港約有75％就業人口收入無法再按年上升，同20％高收入人口差距愈拉愈闊。1980年公司CEO收入是一般打工仔三十倍，今時今日卻是一般打工仔三百倍！收入不平衡形成本港20％高消費層，以及其餘80％一般人（其中25％更可列入貧窮階級，但因為有政府照顧，例如公屋、低收費醫療及免費教育，因此生活唔算困難。反而55％中間收入者，如果又要供樓又睇私家醫生，子女出國讀大學，咁至命）。呢80％人口要搵代罪羔羊，新移民往往成為埋怨對象，而唔知此乃本港工序外移o既結果。

　　除收入差距拉闊，另一問題係階級流動性下降。1967年我老曹只係中學畢業，手上拿著五千元，由當年香港貧窮階級一步步成為本港高收入20％分子，呢情況由1967年到1997年十分普遍，有相似成就o既朋友唔少。但1997年後由貧窮階級憑個人努力而晉身成為香港20％高收入階層o既機會仲有幾多？在美國只有1％，香港應該多DD，估計有5％，即香港階級流動性下降。反之，20％高收入家庭，其子女日後成為20％高收入人士機會有幾多？在美國是22％，在香港更高，估計超過50％。

　　朝為田舍郎，暮登天子堂，將相本無種，男兒（女兒）當自強！過去香港充滿機會，但今天香港社會環境令希望從貧窮階級晉身高收入20％階層機會恐怕只有5％。過去只要努力讀書，便可由貧窮階級變成中產，再努力工作便可成為社會上20％高收入人士；但今天除非特別出色，不然都幾難。過去恒生指數由不足100點升至今天17000點，上升一百七十倍；過去樓價由一百元一呎升至今天六千元一呎，上升六十倍，未來再出現o既機會有幾多？恒生指數1997年8月已是16800點，但至今天為止仍是有波幅冇升幅。